「入五後」懶理痛症 廿年後長痛隨身

首先，人到中年，總會開始發現身上痛楚處處。雖然他們的徵狀才剛剛出現，還未退化至嚴重程度，照理不難處理，但中年痛症患者大多缺乏求醫動機，非到了劇痛階段，是不會去看醫生的。「……你（指「入五後」）個痛係有時好啲，有時差啲，你梗係覺得：『我想去（睇醫生）嘅時候又冇事囉噃！』（於是）你又唔想搞咁多嘢。其實呢楂人——喺我嘅角度——係最幫得到，係可以prevent佢哋20年之後出現一啲慢性痛症，但係呢楂人我哋冇辦法，我哋catch唔到。」

其次，是中年人不知道痛症可以預防。「痛症都要預防，但係預防嗰part其實我哋做得好差，做得差嘅意思係冇人知道呢樣嘢可以預防。你唔覺得你（作為醫生）同人哋（指患者）講痛嘅時候，佢（指患者）冇諗過其實呢個痛係佢廿年累積而來？譬如佢廿年裏面又唔做運動，佢嘅姿勢又差又成日玩手機，跟住食嘢又唔食多啲蛋白質（攝取蛋白質不足致缺乏肌肉），即係幾樣嘢加埋（而造成）。」

第三，則是痛症預防本身也為醫療政策所忽視。「事實上，政府亦都唔會畀資源你（醫療體系）做呢一樣嘢。我哋成日話就話preventive care啫，但係預防咁多疾病，幾時輪到痛症？」她說。

那麼，到了最後，當輕微痛症惡化成慢性痛症，便如薛詠珊所言：「冇得返轉頭，冇得話嚟到睇完醫生，食粒藥以後就好似後生咁——呢樣嘢係冇可能。」

撇除政策層面的因素，作為「入五後」，假若出現痛症，不要以為小事又或疼痛症狀暫時消失而置之不理，應及早求醫，並通過運動增強肌肉（運動示範見另文），加上改善姿勢（見另文）以應對。